49. ૪૯. પરમેહેરુ નવી વાચા

એક હોરગા દુતુહુ એક જુવાન સ્ત્રી મરિયમુલે આખ્યો કા તે પરમેહેરુ પોયરાલે જન્મ આપી. તે આજી કુવારીજ આથી, પેન પવિત્રઆત્મા તીયુ પાહી આલી આને તે ગર્ભવતી વેયી. તીયુહુ એક પોયરાલે જન્મ આપ્યો જીયા નામ ઇસુ રાખ્યો. ઈયા ખાતુરે, ઇસુ પરમેહેર આને માંહુ બેનું હાય.

ઇસુહુ ખુબુજ ચમત્કાર કેયા જો દેખાવેહે કા તોઅ પરમેહેર હાય. તોઅ પાંયુપે ચાલ્યો આને તુફાનુલે શાંત કેયો. તીયાહા ખુબુજ બીમાર લોકુહુને હારે કેયે આને ખુબુજ લોકુમેને દુષ્ટઆત્માહાને કાડયા. તીયાહા મોલા લોકુહુને ફાચા જીવતા કેયા, આને તીયાહા પાંચ માંડા આને બેન માસાકી પાંચ હાજાર લોકુહુને ખાવાવા ખાતુરે પુરતો માંડામે બદલ્યો.

ઇસુ એક મહાન શિક્ષક બી આથો. જો કાય બી તીયાહા હિક્વ્યો, તોઅ તીયાહા સિદ્ધતા આરી હિક્વ્યો. જો તોઅ લોકુહુને કેરા ખાતુરે આખતો તોઅ તીયાહાને કેરા જોજે કાહાકા તોઅ પરમેહેરુ પોયરો હાય. દાખલા માટે, તીયાહા હિક્વ્યો કા તુમનેહે અન્ય લોકુહુને તીયુજ રીતીકી પરે કેરુલો જરુર હાય જેહેકી તુમુહુ પોતાલે કેતાહા.

તીયાહા ઇ બી હિક્વ્યો કા તુમનેહે બાદી વસ્તુ કેતા વાદારે આને પોતા માલ-મિલકતુ કેતા બી વાદારે પરમેહેરુ આરી પ્રેમ કેરા જોજે.

ઇસુહુ આખ્યોહો કા જગતુ કેલ્લી બી વસ્તુ મિલવા કેતા વાદારે હારો હાય પરમેહેરુ રાજ્યમે વેરુલો. તીયા રાજ્યમે તુમા વીહા માટે જરુરી હાય કા પરમેહેર તુમનેહે તુમા પાપુમેને વાચાવે.

ઇસુહુ આખ્યો કા થોડાક લોક તીયાલે સ્વીકાર કેરી. પરમેહેર તીયા લોકુહુને વાચાવી. પેન બીજા લોક તીયાલે સ્વીકાર નાય કેરી. તીયાહા ઇ બી આખ્યોહો કા થોડાક લોક હારી જાગા હોચે હાય, કાહાકા તે ઇસુ ખ્રિસ્તુ વિશે હારી સુવાર્તાલે સ્વીકાર કી લેતાહા, આને પરમેહેર તીયાહાને વાચાવેહે. પેન થોડાક લોક વાટી કઠણ જાગા હોચે હાય. પરમેહેરુ વચન બીયારા હોચે વાટીપે પોળેહે, પેન તીહી કાય બી નાહ ઉગતો. એ લોક ઇસુ ખ્રિસ્તુ વિશે સુવાર્તાલે અસ્વીકાર કી દેતાહા. તે તીયા રાજ્યમે પ્રવેશ કેરુલો ઇનકાર કી દેતાહા.

ઇસુહુ હિક્વ્યોહો કા પરમેહેર પાપીહીને ખુબુજ પ્રેમ કેહે. તોઅ તીયાહાને માફ કેરા ઈચ્છેહે આને તીયાહાને પોતા પોયરે બોનાવા માગેહે.

ઇસુહુ ઇ બી આખ્યોહો કા પરમેહેર પાપુકી ઘ્રીણા કેહે. કાહાકા આદમ આને હવાહા પાપ કેયો, ઈયા ખાતુરે તીયા વંશુહુ બી પાપ કેયો. ઈયા જગતુમે રેનારા દરેક માંહુ પાપ કેહે આને પરમેહેરુકી દુર હાય. દરેક માંહુ પરમેહેરુ દુશ્મન હાય.

પેન પરમેહેર ઈયા જગતુમે રેનારા દરેક માંહુ ઈયુ રીતીકી પ્રેમ કેહે: તીયાહા પોતા એકુ-એક પોયરાલે આપી દેદો કા પરમેહેર તીયાહાને દંડ નાય આપે જે તીયાપે વિશ્વાસ કેતેહે. ઈયા બદલે, તે તીયા આરી સાદા માટે રીઅ.

તુમુહુ મોરુલો યોગ્યો હાય, કાહાકા તુમુહુ પાપ કેયોહો. તુમાપે પરમેહેરુ ક્રોધિત વેરુલો ઉચિત હાય, ઈયા બદલે, તોઅ ઇસુ ખ્રિસ્તુપે ક્રોધિત વીયો. તીયાહા ઇસુલે ક્રુસુપે મૃત્ય આપીને દંડ આપ્યો.

ઇસુહુ કીદીહીજ પાપ નાહ કેયો, પેન તીયાહા પરમેહેરુલે તીયા દંડ આપા દેદો. તીયાહા મોય જાંઅ સ્વીકાર કેયો. ઈયુ રીતીકી, તુમા પાપુહુંને આને ઈયા જગતુમે રેનારા દરેક લોકુ પાપુહુને દુર કી દેવુલો માટે તોઅ એક સિદ્ધ બલિદાન આથો. ઇસુહુ પોતાલે પરમેહેરુ માટે બલિદાન કી દેદો, ઈયા ખાતુરે પરમેહેર કેલ્લા બી પાપુલે, ઇહી લોગુ કા ભયંકર પાપુહુંને માફ કેહે.

ભલે કાદાચ તુમુહુ ખુબુજ હારા કામુહુને કેતાહા, તા ઈયા મારફતે પરમેહેર તુમનેહે નાય વાચાવે. તીયા દોસ્દાર બોના માટે એહેકી કાયજ નાહ કેયો જો તુમુહુ કી સેક્તાહા. ઈયા બાળે, તુમનેહે વિશ્વાસ કેરુલો હાય કા ઇસુ ખ્રિસ્ત પરમેહેરુ પોયરો હાય, આને તોઅ તુમા બદલે ક્રુસુપે મોય ગીયો, આને ઇ બી કા પરમેહેર તીયાલે ફાચે જીવતો કી દેદો. કાદાચ તુમુહુ ઈયુ ગોઠીપે વિશ્વાસ કેરા, તા પરમેહેર તુમા પાપુહુંને માફ કેરી.

પરમેહેર તીયા દરેક માંહાલે વાચાવી જો ઇસુપે વિશ્વાસ કેહે આને તીયાએ પોતા પ્રભુ સ્વીકાર કેહે. પેન તોઅ તીયાહાને નાય વાચાવે જે તીયાપે વિશ્વાસ નાહ કેતે. ઇ કાયજ એહમિયત રાખતો કા તુમુહુ માલદાર હાય કા ગરીબ હાય, આદમી હાય કા સ્ત્રી વેરી, ડાયે હાય કા જુવાન, કા તુમુહુ કાંહી રેતાહા. પરમેહેર તુમનેહે પ્રેમ કેહે આને ઈચ્છેહે કા તુમુહુ ઇસુપે વિશ્વાસ કેરા કા તોઅ તુમા દોસ્દાર બોની સેકે.

તુમનેહે હાદેહે કા તીયાપે વિશ્વાસ કેરા આને બાપ્તીસ્મો લી શેકા. કાય તુમુહુ વિશ્વાસ કેતાહા કા પરમેહેર એકુ-એક પોયરો, ઇસુજ ખ્રિસ્ત હાય? કાય તુમુહુ વિશ્વાસ કેતાહા કા તુમુહુ પાપી હાય આને ઇ બી કા તુમુહુ પરમેહેરુ મારફતે તુમનેહે દંડ આપુલો યોગ્યો હાય? કાય તુમુહુ વિશ્વાસસ કેતાહા કા તુમા પાપુહુને દુર કેરા ઇસુ ક્રુસુપે મોયો?

કાદાચ તુમુહુ ઇસુપે આને જો તીયાહા તુમા માટે કેયોહો તીયાપે વિશ્વાસ કીહા, તા તુમુહુ એક ખ્રિસ્તી હાય! શૈતાન પોતા અંધકારુ રાજ્યમે આમી તુમાપે શાસન નાહ કેતો. આમી પરમેહેર પોતા પ્રકાશુ રાજ્યમે તુમાપે શાસન કેહે. તીયાહા તુમનેહે પાપ કેરા રોકી દેદાહા, જીયાલે તુમુહુ કેતલા. તીયાહા તુમનેહે એક નવો, યોગ્યો જીવન આપ્યોહો.

કાદાચ તુમુહુ એક ખ્રિસ્ત હાય તા ઇસુહુ કેયોહો તીયા લીદે પરમેહેર તુમા પાપુહુંને માફ કી દેદાહા. આમી, પરમેહેર એક દુશ્મન માનુલો બદલે તુમનેહે ખાશ દોસ્દાર માનેહે.

કાદાચ તુમુહુ પરમેહેરુ દોસ્દાર હાય આને પ્રભુ ઇસુ સેવક હાય તા તુમુહુ તીયુ ગોઠી પાલન કેરા ઈચ્છા કેરાહા જે ઇસુ તુમનેહે હિક્વેહે. ભલે તુમુહુ એક ખ્રિસ્તી હાય, શૈતાન આમી બી પાપ કેરા માટે તુમા પરીક્ષા કેરી. પેન પરમેહેર સાદા તોઅ કેહે જો તોઅ આખેહે કા તોઅ કેરી. તોઅ આખેહે કા કાદાચ તુમુહુ પોતા પાપુલે માની લીહા, તા તોઅ તુમનેહે માફ કેરી. તોઅ તુમનેહે પાપુ વિરુધ લડુલો સામર્થ આપી.

પરમેહેર તુમનેહે પ્રાર્થના કેરા આને તીયા વચનુલે વાચા માટે આખેહે. તો તુમનેહે અન્ય વિશ્વાસી લોકુ આરી મીલીને તીયા આરાધના કેરા માટે આખેહે. તુમનેહે બીજા લોકુહુને આખુલો બી હાય કા તીયાહા તુમા માટે કાય કેયોહો. કાદાચ તુમુહુ ઈયા બાદા કામુહુંને કેરા, તા તુમુહુ તીયા ખેરા દોસ્દાર બોની જાહા.