25. ૨૫. શૈતાન ઇસુ પરીક્ષા કેહે

ઇસુ બાપ્તીસ્મો વેરુલો તુરુત પછીજ, પવિત્ર આત્મા તીયાલે જંગલૂમે લી ગીયો. ઇસુ તીહી ચાલીસ દિહ આને ચાલીસ રાત લોગુ તીયાહા ઉપાસ કેયો, આને શૈતાનુહુ ઇસુ પાહી આવીને પાપ કેરાવા ખાતુરે તીયા પરીક્ષા કેયી.

પેલ્લા શૈતાન ઇસુલે આખેહે, “કાદાચ તુ પરમેહેરુ પોયરો વેરી તા ઈયા ડોગળાલે રોટલી બોનાવી દેઅ કા તુ ખાય સેકો!”

પેન ઇસુહુ શૈતાનુલે આખ્યો, “પરમેહેરુ વચનુમે ઇ લેખલો હાય, ‘જીવતા રાંઅ માટે માંહુ ખાલી માંડા જરુર નાહ, પેન તીયાહાને દરેક તીયુ ગોઠી જરુરત હાય જે પરમેહેર તીયાહાને આખેહે.’”

તાંહા શૈતાન ઇસુલે મંદિરુ બાદા કેતા ઉચા ભાગુમે લી ગીયો. તીયાહા તીયાલે આખ્યો, “કાદાચ તુ પરમેહેરુ પોયરો હાય તા ઇહીને નીચે કુદી જો, કાહાકા લેખલો હાય, ‘પરમેહેર તુલે તેરા ખાતુરે હોરગા દુતુહુને આજ્ઞા આપી કા તોઅ પાગુમે ઠેસ નાય લાગે.’”

પેન ઇસુહુ તોઅ નાહ કેયો જો શૈતાનુહુ તીયાલે કેરા આખલો. ઈયા બદલે, તીયાહા આખ્યો, “પરમેહેર દરેકુહુને આખેહે, ‘તુ પ્રભુ પોતા પરમેહેરુ પરીક્ષા માઅ કીહો.’”

ફાચે શૈતાનુહુ તીયાલે જગતુ રાજ્ય દેખાવ્યે. તીયાહા તીયાલે દેખાવ્યે કા તે કોતે શક્તિશાલી આથે, આને તે કોતે સમ્પન્ન આથે, તીયાહા ઇસુલે આખ્યો, “આંય તુલે ઇ બાદોજ આપેહે કદાચ તુ ઘુટણે પોળીને માઅ આરાધના કીહો.”

ઇસુહુ જવાબ આપ્યો, “ઓ શૈતાન, માઅ પાહીને જાતો રેઅ! પરમેહેરુ વચનુમે તોઅ લોકુહુને આદેશ આપેહે, ‘ખાલી પોતા પ્રભુ આરાધના કેરા. પરમેહેરુ રુપુમે ખાલી તીયાજ આદર કેરા.’”

ઇસુહુ શૈતાનુ પરીક્ષા કી હાર નાહ માની, ઈયા ખાતુરે શૈતાન તીયા પાહીને જતો રીયો. તાંહા હોરગામેને દુતુહુ આવીને ઇસુ સેવા ચાકરી કેયી.