1. दुनिया घासु

सूरु रु परमेश्‍वर सू भिरछन गाछु इदु सू टुकू ज्यारु रु दुनिया घासु। खेरी लिलो दुनिया जो बिर छन गाछु। सू दुनिया गाम कू बाद नीमांग नीचू बिर भड़ं हुमाड़ं अज्यु खाली नीजु खलन की इता परमेश्‍वर सू धरती रु खेरी मुघासु इदू हन्दू परमेश्‍वर सू लेमे ती रु फेरसी निजू।

इता परमेश्‍वर सु लिसू की छाजु लिलो अज्यू छाजु कलजु। परमेश्‍वर सु ताड़ंसु छाजु जेनू लि परमेश्‍वर सू छाजु जो नुक्छु लिजु। अज्यु इदु सु नुक्छु सु मुंछू खिजु घासु। इदजो मुंछु लिसु परमेश्‍वर सु दुनिया बनेमु कु तुकतू ज्या छाजु घासु।

दुनिया घामु कु खिजु ज्यारु परमेश्‍वर सु लिसु ती कु घुन्दा ताकु खाली लयाड़ं अज्यु ती कु ताकु खिजु जो अलग लिलो अनमा लिजु परमेश्‍वर सु खिजु घायनु भांड़ं जो तुखू लिसु।

सुम ज्या सु परमेश्‍वर सु लिसु ती ताकु भड़ं रु थुमसिलो अज्यु छरनु भड़ं ताड़ंयो परमेश्‍वर सु छरनु भड़ं जो धरती लिसु अज्यु ती जो यागंती लिसु। परमेश्‍वर सु ताड़ंसु कि अल्या इदसु बनेसु इदु जेनु निजु।

तब परमेश्‍वर सु लिसु धरती रु बिर सिड़ं झिलो अज्यु अनमा लियो। परमेश्‍वर सु ताड़ंसु कि अल्या इदसु बनेसु इदु जेनु निजु।

दुनिया बनेमु पि ज्या रु परमेश्‍वर सु लिसु तुखू रु रोशनी धामु तब नी ,चॉद अज्यु तारे पिराचु। परमेश्‍वर सु उइ रोशनी जो नी उजाला दामु हन्दु बनेसु अज्यु नुक्छू अज्यु मुन्छू अज्यु सिलाड़ं अज्यु छिलाड़ं अज्यु हिड़ं खिजु घामु हन्दु बनेसु।

नाई ज्या परमेश्‍वर सु लिसु यंगती रु जीव जन्तु भुयाहन अज्यु तुखू रु पक्षी जो बनेसु। अनमा घालन ती रु भोयडा छानु बिर जानवर अज्यु पक्षी बनेसु। परमेश्‍वर सु ताड़ंसु इदु जेनु ले अज्यु आशिर्वाद दासु।

धरती घामु हन्दु टुकू ज्या परमेश्‍वर सु लिसु धरती रु सियनू खिजु खिजु रे माला रायाड़ं। परमेश्‍वर सु लिसु इदमा ना कलचु। अल्या रे माला ढुड़ंमु निजु। धरती रु पेथे पेथे दिजु। अज्यु अल्या रे माला निजु। परमेश्‍वर सु ताड़ंसु इदु जेनु ले।

तब परमेश्‍वर सु लिसु योनी निड़ं अफी रुप रंग अज्यु अफी माघरतु बनेसु। इदु मी धरती रु अज्यु बिर रे माला जो राज घाघदा।

परमेश्‍वर सु सा कुरलन इदु मी बनेसु अज्यु इदु जीवन कु सॉस किघादुसु। अन्दु मी कु मुड़ं आदम निजु। परमेश्‍वर सु आदम सुयमु हन्दु ताकु पुनु बगीचा बनेसु अज्यु उकु देखभाल घामु हन्दु आदम तासु।

इदु बगीचा कु घुनदा रु परमेश्‍वर सु निसु जैनु सिड़ं लगेसु। ताकु जीवन कु सिड़ं अज्यु खिजु जेनु यानु समझेनु सिड़ं लगेसु। परमेश्‍वर सु आदम जो लिसु गे इदु जेनु यानु समझेनु सिड़ं कु फल मुजा तरसड़ं। गे बिर कु सिड़ं कु फल जा तरसन। अज्यु इदु सिड़ं फल जायजे गे सिजायहन।

तब परमेश्‍वर सु लिसु होरासिरी जो तामिना सुड़ंनु जेनु महा। खलन कि घबरी रे माला आदम कु साथु मुनिजु।

इदुसु परमेश्‍वर सु आदम जो दलना इफा रु किघानिजु। परमेश्‍वर सु आदम जो ताकु खासया सु ताकु भुदाचुमे बनेसु अज्यु इदु आदम कु लगान्दी रेलन राजु।

इदु आदम जो भुदाचुमे ताड़ंसु ते इदसु लिसु अन्दु जिकु माघरतु ले। इदुजो भुदाचुमे लाड़ंदा। खलन कि अन्दु होरासिरी अफी मिना भा सिदिसु। अज्यु अफी भुदाचुमु रकसा निनि।

परमेश्‍वर सु होरासिरी अज्यु भदाचुमे जो अफी रुप रंग बनेसु। परमेश्‍वर इदजो आशिर्वाद दासु। अज्यु उसु लिसु दलना सिरी खि खेमे जो जन्म दा अज्यु धरती रु भुड़ंलो। परमेश्‍वर सु उड़ंसु जो ले बनेसु इदु जेनु निनि। अज्यु परमेश्‍वर इदुसु दलना खुश निजु। इदु बिर झन टुकु ज्या रिजु।

जेयदु ज्या परमेश्‍वर सु अफी बिर लन पुरकुजु। इदसु जेयदु ज्या रु आशिर्वाद दासु अज्यु शुद्ध घासु खलन कि इदसु 7 जेयदु ज्या अफी बिर लन पुरकुजु। इदु हन्दु परमेश्‍वर सु दुनिया जो अज्यु जो ले दुनिया रु निनि इदु बनेसु।