19. દેવ સહુન બોલનાર

દેવ કાયીમ ઈસરાયેલી સાહપાસી દેવ સહુન બોલનાર સાહલા દવાડત રહ હતા. દેવ સહુન બોલનાર દેવ પાસુન સંદેશ આયક હતાત અન માગુન તી લોકા સાહલા સાંગ હતાત.

જદવ આહાબ ઈસરાયેલ રાજ્યવર રાજા હતા ત તે સમય એલિયા દેવ સહુન બોલનાર હતા. આહાબ એક વેટ માનુસ હતા. તેની ખોટા બઆલ દેવાસી પુંજા કરુલા સાટી લોકા સાહલા મજબુર કરેલ હતા. તે સાટી એલિયાની આહાબલા સાંગા કા દેવ તે લોકા સાહલા દંડ દેવલા આહા. તેની તેહાલા સાંગા, “જાવ પાવત મા ફીરીની પાની વરસુલા નીહી સાંગા તાવ પાવત ઈસરાયેલને રાજ્યમા પાની નીહી વરસનાર અન નીહી વસ પડનાર.” યે ગોઠની આહાબલા હોડા રગવાડી દીદા કા તેની એલિયાલા મારી ટાકુના નીરનય કરના.

તે સાટી દેવની એલિયાલા સાંગા કા તો રાનમા જાયીની આહાબ પાસુન દપી જા. એલિયા રાનમા તે વહળ (ઝરણા) પાસી ગે જઠ જાવલા સાટી દેવની તેલા દાખવેલ હતા. દરેક સકાળના અન દરેક એળચના, લીટકા એલિયાને સાટી ભાકર અન માંસ લીની યે હતાત. યો અખા સમય, આહાબ અન તેની સેના એલિયાલા ગવસ હતાત, પન તે તેલા ગવસી નીહી સકનાત.

પાની નીહી વરસના તેને કારને થોડાક સમય માગુન તી વહળ સુકાયજી ગે. તે સાટી નજીકને એક દેશમા નીંગી ગે. તે દેશમા એક ગરીબ રાંડકી હતી. તીલા એક પોસા હતા. તી પાસી ખાવલા લગભગ પુરા હુયી ગે હતા કાહાકા તઠ કાહી પીકનેલ નીહી. પન તરી બી, તે બાયકોની એલિયાની સંભાળ કરી, તે સાટી દેવની તીની અન તીને પોસાની જરૂરિયાત સાહલા પુરા કરના, તે કારનથી તીને પીઠના બાસન અન તીને તેલની સીસી ખાલી નીહી હુયીલ. તે પુરા દુકાળના સમયમા તી પાસી ખાવલા હતા. એલિયા થોડાક વરીસ પાવત તઠ રહના.

સાડે તીન વરસાસે માગુન, દેવની એલિયાલા સાંગા કા તો ફીરીની પાની વરસવીલ. તેની એલિયાલા ફીરીની ઈસરાયેલને રાજ્યમા જાયીની આહાબ હારી ગોઠ કરુલા સાટી સાંગના. તે સાટી એલિયા આહાબ પાસી ગે. જદવ આહાબની તેલા હેરા ત તેની સાંગા, “હં ત મુશ્કેલી લયવાવાળા તુ આહાસ!” એલિયની જવાબ દીદા, “મુશ્કેલી લયવાવાળા ત તુ આહાસ! તુ યહોવાલા સોડી દીનાહાસ. તો જ ખરા દેવ આહા, પન તુ બઆલની પુંજા કરી રહનાહાસ. આતા તુલા ઈસરાયેલને અખે લોકા સાહલા કાર્મેલ ડોંગરવર લી યેવલા આહા.”

તાહા અખા લોકા કાર્મેલ ડોંગરવર ગેત. તે ગોહો બી આનલા જે બઆલના સંદેશલા સાંગ હતા. તે બઆલ સહુન બોલનાર હતાત. તે અખા 450 હતાત. એલિયાની લોકા સાહલા સાંગા, “કોડાક પાવત તુમી તુમને મન સાહલા ફીરવી રાખસેલ? જો યહોવા દેવ આહા ત તેની આરાધના કરા! જો બઆલ દેવ આહા ત તેની પુંજા કરા!”

તાહા એલિયાની બઆલ સહુન બોલનાર સાહલા સાંગા, “એક બયીલલા બલિદાન કરીની તેને માંસલા બલિદાન કરુલા સાટી વેદીવર ઠેવા, પન ઈસતોકન પેટવસે નોકો. અન તેને માગુન મા બી તીસા જ કરીન, અન એક વાયલે વેદીવર મા તે માંસલા રાખીન. તાહા જો દેવ વેદીવર ઈસતો પાડહ ત તુમી જાની લેસાલ કા તો ખરા દેવ આહા.” તાહા બઆલ સહુન બોલનારસી એક બલિદાનલા તયાર કરા પન ઈસતો નીહી પેટવી.

તાહા બઆલ સહુન બોલનારસી બઆલલા પ્રાર્થના કરી કા, “હે બઆલ, આમના આયક!” પુરા દિસ તેહી પ્રાર્થના કરી અન આરડનાત હોડે સુદી કા ચાકુ સાહવાની કાપી લીનાત, પન બઆલની જવાબ નીહી દીદા, અન તેની કાહી ઈસતો નીહી પાડી.

બઆલ સહુન બોલનારસી બઆલલા પ્રાર્થના કરુમા લગભગ પુરા દિસ કાડી ટાકનાત. સેલે તેહી પ્રાર્થના કરુલા બંદ કરી દીનાત. તાહા એલિયાની દુસરે બયીલને માંસલા દેવને વેદીવર ઠેવી દીદા. તેને માગુન, તેની પાનીને મોઠલા બાસના સાહલા તે બલિદાનવર તાવ પાવત ઉબરુલા લાવના જાવ પાવત કા માંસ, લાકડા, અન હોડે સુદી કા વેદીને આજુબાજુની જમીન પૂરે રીતે ભીજી નીહી ગય.

તાહા એલિયાની પ્રાર્થના કરી, “હે યહોવા, ઈબ્રાહીમ, ઈસાહાક અન યાકુબના દેવ, આમાલા દાખવ કા તુ ઈસરાયેલના દેવ આહાસ અન યી કા મા તુના સેવક આહાવ. માલા જવાબ દે જેથી કા યે લોકા જાની લેતીલ કા તુ ખરા દેવ આહાસ.”

લેગજ, આકાશ માસુન ઈસતો પડની અન તેની માંસ, લાકડા, ખડક, માટી અન હોડે સુદી કા વેદીને આજુબાજુનને પાનીલા બી પેટવી ટાકના. જદવ લોકાસી યી હેરા, તે જમીનવર પડી ગેત અન સાંગનાત, “યહોવા જ દેવ આહા! યહોવા જ દેવ આહા!”

તાહા એલિયાની સાંગા, “બઆલના એકપન બઆલ સહુન બોલનાર બચી ન જાવલા નીહી પડ!” તે સાટી લોકાસી બઆલ સહુન બોલનાર સાહલા ધરી લીદાત અન તેહાલા તઠુન વાયલે લી ગેત અન તેહાલા મારી ટાકા.

તાહા એલિયાની આહાબ રાજાલા સાંગા, “લેગજ તુને ઘર પોળી ધાવ, કાહાકા પાની વરસુલા આહા.” લેગજ ઢગ પકા ગોળા હુયી ગેત, અન પકા પાની ચાલુ હુયી ગે. યહોવા સુકાયજેલ તેલા પુરા કર હતા. તેકન પરગટ હુયના કા યહોવા જ ખરા દેવ આહા.

જદવ એલિયાની તેના કામ પુરા કરી દીના, ત દેવની એલીશા નાવને એક ગોહોલા તેના દેવ સહુન બોલનાર સાટી પસંદ કરા. દેવની એલીશા મારફતે ખુબ ચમત્કાર કરના. એક ચમત્કાર નામાનને હારી હુયના. તો એક દુશ્મનને સેનાના સરદાર હતા, પન તેલા કાતડીના એક વેટ રોગ હુયેલ હતા. નામાનની એલીશાને બારામા આયકેલ હતા, તે સાટી તો એલીશા પાસી આના અન તેલા બેસ કરુલા સાટી તેલા વિનંતી કરના. એલીશાની નામાનલા સાંગના કા જાયીની યરદન નયને પાનીમા સાત વાર ડૂબકી મારી લે.

નામાન રગમા યી ગે. તેની ઈસા કરુલા સાટી નકાર કરી દીના, કાહાકા યી તેલા મૂરખાયના કામ લાગ હતા. પન માગુન તેની તેના મન બદલી લીના અન જાયીની યરદન નયને પાનીમા સાત વાર ડૂબકી મારના. જદવ સેલી વખત તો પાની માસુન બાહેર નીગના ત દેવની તેલા બેસ કરી દીદા.

દેવની ઈસારાયેલ લોકા સાહપાસી દુસરે ખુબ દેવ સહુન બોલનાર સાહલા દવાડાત. તે અખેસી લોકા સાહલા મુરતીસી પુંજા બંદ કરી દેવલા સાટી સાંગનાત. તેને જાગ, તેહાલા એક દુસરે હારી નેય પૂર્વક વ્યવહાર કરુલા પડ અન એક દુસરેવર દયા કરુલા પડ. તે દેવ સહુન બોલનારસી લોકા સાહલા ચેતવની દીદી કા તેહી ખોટા કામા સાહલા કરુલા બંદ કરી દેવલા આહા અન તેને સીવાય દેવને ગોઠી સાહલા પાળુલા આહા. જો તે લોકાસી ઈસા નીહી કરા ત દેવ તેહાલા દોષી માનિની તેહના નેય કરીલ, અન તેહાલા દંડ કરીલ.

વદારે સમય, તે લોકાસી દેવની આજ્ઞાલા નીહી પાળનાત. ખુબ વખત તેહી દેવ સહુન બોલનારસે હારી વેટ વ્યવહાર કરા અન હોડે સુદી કા કદી કદી તેહાલા મારી ટાકા. એક વખત, યર્મિયા દેવ સહુન બોલનારલા કોરડે કુવામા ટાકી દીદેલ અન તેલા તઠ મરુલા સાટી સોડી દીદા. તો કુવાને તળલા ચીખોલમા ભરાયજી ગે. પન તાહા રાજાલા તેવર દયા આની અન તેની તેને સયનીક સાહલા હુકુમ દીના કા યર્મિયાલા મર તેને પુડ કુવા માસુન બાહેર વહડી કાહડા.

દેવ સહુન બોલનારસી દેવ સહુન બોલુલા ચાલુ જ રાખનાત ભલે તે તેહાલા નફરત કરી. તેહી લોકા સાહલા ચેતવની દીદી કા જો તેહી પસ્તાવા નીહી કરા ત દેવ તેહના નાશ કરી દીલ. તેહી લોકા સાહલા યી બી આઠવ કરવા કા દેવની તેહા પાસી ખ્રિસ્તલા દવાડુલા વચન દીયેલ આહા.