33. इक किसान दी कहाणी

इक दिन, यीशु झीला दे बखे था। सै लोकां दी इक बड़ी बडिया भिड़ा जो शिक्षा दे दा था। उसयो सुणने तांई इतणे सारे लोक आयो थे कि यीशुऐ बाल उना सारयां ने गल्ल बात करणे तांई जगा नी बची। इस तांई सै पाणिऐ च खड़ोतियो किस्तियो पर चढ़ी गिया। ओथु सै बैई गिया कने लोकां जो शिक्षा दिती।

यीशुऐ उना जो ऐ कहाणी सुणाई, "इक किसान बी राणे तांई बाहर निकलया। जालू सै हथां ने बी रा दा था, तां कुछ बी रस्ते पर पे। पर पंछिया आई करी उना सारयां बीयां जो खाई लिया।"

थोड़े बी पथरीलिया धरतिया पर पे जिथू बड़ी घट मिट्टी थी। पथरीलिया धरतिया पर पियो बी बड़ी तोली लुंगी पे, पर मिटी घट होणे दिया बजा ला उना दियां जड़ा डुगियां नी गियां। जालू सूरज निकलया कने गर्मी होई तां सै बूटे मुरझाई गे कने मरी गे।

कने कुछ बी झाड़ियां बीच पे। उना बियां बदणा शुरू किता, पर कंडयां उना जो दबाई दिता। इस तांई झाड़ियां बालिया जगा पर पियो बियां चे कोई भी अनाज पैदा नी करी सकया।

कुछ बी खरिया धरतिया पर पे। सै बी बदे कने जितणे बी रायो थे उना 30, 60, कने 100 गुणा अनाज पैदा किता। जड़ा कोई भी परमेश्वरे पीछे चलना चांदा है, सै उना गल्लां पर ध्यान दे जड़ा मैं बोला दा है!

इना कहाणिया चेलयां जो उलझन च पाई दिता। इस तांई यीशुऐ इसा कहाणिया दा मतलब दसया की, "सै बी परमेश्वरे दा वचन है। सै रस्ता इक ऐसा माणु है जड़ा परमेश्वरे दे वचने जो सुणदा है, पर उसयो समझदा नी है। तालू शैतान उदे ला वचने जो चोरी लेई जांदा है। शैतान उसयो वचन समझणे ला दूर रखदा है।"

सै पथरीली जगा ऐसा माणु है जड़ा परमेश्वरे दे वचने जो सुणदा है कने खुशिया सोगी उसयो अपनाई लेंदा है। पर जालू मुश्किल बकत ओंदा है, या जालू होर लोक उसयो सतांदे न, तां सै परमेश्वरे ला दूर चली जांदा है। मतलब की सै परमेश्वरे पर भरोसा करणा बंद करी दिंदा है।

सै झाड़ियां बाली जगा ऐसा माणु है जड़ा परमेश्वरे दे वचन जो सुणदा है। पर मतियां गल्लां दे बारे च चिन्ता करणा शुरू करी दिंदा है, कने मता पैसा कमाणे दी कोशिश करदा है, कने सै मतियां चीजां जो पाणे दी कोशिश करदा है। कुछ बकत दे बाद, हुण सै परमेश्वरे जो खुश करणे दे काबिल नी है। इस तांई जड़ा उनी परमेश्वरे दे वचने ला सीखया था सै उसयो परमेश्वरे जो खुश करणे दे काबिल नी करदा है। सै कणका दे डंठलां सांई है जड़ा कोई अनाज पैदा नी करदियां न।

पर खरी जगा सै माणु न जड़े परमेश्वरे दे वचन जो सुणदे न, कने उस पर भरोसा करदे न, कने फल पैदा करदे न।