16. परमेसवर मूसा ताहीं बुलावै सै

यूसुफ के मरण के बाद उसके सारे रिश्तेदार मिस्र म्ह बसगे। वे अर उनके वंशज कई साल्लां ताहीं मिस्र म्ह ए रहे अर उननै घणी ऊलाद पैदा करी। वे इस्राएली कुहाये।

कई सौ साल्लां के बाद, इस्राएलियां की गिणती भोत बढ़गी थी। अर मिस्री लोग इब इस बात के लिए आभारी न्ही थे के उनकी मदद करण खात्तर यूसुफ नै भोत कुछ करया था। वे इस्राएलियां तै डरगे क्यूकें वे गिणती म्ह उनतै भोत घणे थे। ज्यातै उस बखत मिस्र पै शासन करण आळे फिरौन नै इस्राएलियां ताहीं मिस्रियां का दास बणा दिया।

मिस्रियां नै इस्राएलियां ताहीं भोत सी इमारतां अर उरै ताहीं के कई नगरां ताहीं बणाण के खात्तर मजबूर करया। उस कठिन परिश्रम नै उनकी जिन्दगी ताहीं बड़ा दुःखदायी बणा दिया, पर परमेसवर नै उन ताहीं आशीष देई अर उनकै और घणी ऊलाद पैदा करी।

फिरौन नै देख्या के इस्राएलियां के घणी ऊलाद पैदा हो रही थीं, ज्यातैं उसनै अपणे लोगां ताहीं इस्राएलियां के सारे नर बच्यां ताहीं नील नदी म्ह फेंककै मार गेरण का हुकम दिया।

एक खाश इस्राएली जनानी नै एक नर बच्चा ताहीं जन्म दिया। उसनै अर उसके पति नै जितणा उनतै हो सक्या उस बच्चे ताहीं छिपाकै राख्या।

जिब उस बाळक के माता-पिता उसनै और घणा ना छिपा सके, तो उननै उसे ताहीं मारे जाण तै बचाण के खात्तर एक तैरण आळी टोकरी म्ह नील नदी के किनारे पै सरकंडया के बिचाळै रख दिया। उसकी बड़ी भाण नै यो देखण के खात्तर उसकी निगरानी करी के उसके गैल के होवैगा।

फिरौन की बेट्टी नै उस टोकरी ताहीं देखकै उसकै भीतर झाँक्या। जिब उसनै एक बच्चे ताहीं देख्या तो उसनै उस ताहीं अपने बच्चे के रूप म्ह ले लिया। उसनै एक इस्राएली जनानी ताहीं उस ताहीं दूध पिलाण के खात्तर काम पै रख लिया, बिना यो जाणे के वा उस बच्चे की असली माता थी। जिब वो बच्चा इतना बड़ा हो ग्या के इब उसनै अपणी माता के दूध की जरुरत न्ही थी, तो उसनै फिरौन की बेट्टी धोरै उस ताहीं लौटा दिया, उसका नाम मूसा था।

एक दिन, जिब मूसा बड़ा हो ग्या था, तो उसनै देख्या के एक मिस्री एक इस्राएली ताहीं पिट रह्या सै। मूसा नै अपणे साथी इस्राएली ताहीं बचाण का प्रयास करया।

जिब मूसा नै सोच्या के उस ताहीं कोए न्ही देखैगा तो उसनै उस मिस्री ताहीं मार गेरया अर उसके शव ताहीं दफन कर दिया। पर मूसा नै जो करया था उस ताहीं किसे नै देख लिया था।

फिरौन ताहीं मालूम हो ग्या के मूसा नै के करया सै। उसनै उस ताहीं मार गेरण का प्रयास करया, पर मूसा मिस्र जंगल म्ह भाग ग्या। फिरौन के सैनिक उस ताहीं औड़ै खोज ना सके।

मिस्र तै दूर जंगळ म्ह मूसा एक पाळी बण ग्या था। उसनै औड़ै एक जनानी तै ब्याह कर लिया अर दो बेट्टे पैदा करे।

मूसा अपणे ससुर के भेड़ां के झुंड की देखभाळ करै था। एक दिन, उसनै एक जळदी होई झाड़ी ताहीं देख्या जो भस्म होये बिना जळ रही थी। उसनै देखण के खात्तर वो उस झाड़ी के धोरै गया। जिब वो उसकै भोत लोवै था तो परमेसवर नै उसतै बात करी। उसनै कह्या, "हे मूसा, अपणे जूत्यां ताहीं तार दे। तू एक पवित्र जगहां पै खड़या सै।"

परमेसवर नै कह्या, "मन्नै अपणे लोगां के दुःखां ताहीं देख्या सै। मैं तन्नै फिरौन के धोरै भेज्जूंगा ताके तू इस्राएलियां ताहीं मिस्र के दासत्व तै लिकाड़ ल्यावै। मैं उन ताहीं कनान देश दयूगां, वा देश जिसका मन्नै अब्राहम, इसहाक अर याकूब तै वादा करया सै।"

मूसा नै पूछ्या, "जै लोगां नै जाणणा चाह्या के मेरे ताहीं किसनै भेज्या सै तो मैं के कहूँ?" परमेसवर नै कह्या, "जो मैं हूँ सो मैं हूँ। उनसे कहो, 'मैं हूँ नै मेरे ताहीं थारै धोरै भेज्या सै।' उनतै यो भी कह्यो, 'मैं थारे पूर्वजां अब्राहम, इसहाक अर याकूब का परमेसवर यहोवा सूं।' मेरा यो नाम सदा का सै।"

मूसा डरै था अर फिरौन के धोरै जाणा न्ही चाहवै था क्यूकें उसनै सोच्या के वो आच्छा न्ही बोल पावैगा, इस करकै परमेसवर नै मूसा के भाई, हारून, ताहीं उसकी मदद करण के खात्तर भेज्या। निर्गमन अध्याय 1-4 से एक बाइबल की कहानी