18. विभाजित राज्य

दाऊद राजा चालीस साल तक शासन करिस ओखे बाद व मर गा, तब ओखे बाद वाखर बेटवा सुलैमान इस्राराएल म शासन करे का शुरू करिस । परमातिमा सुलैमान से बात करके पूछीन कि ते सबसे ज्यादा का चाहते हस कि तोरे लाने ऊं करां। सुलैमान परमातिमा से मांगीस कि ओही सबसे बुद्धिमान मन‌ई बना दें तब परमातिमा ओसे खुश होईगें अऊ ओही संसार के सबसे बड़ा बुद्धिमान मनाई बना द‌ईन। सुलैमान बहुत से बातन का सीखिस अऊ बुद्धिमान शासक भी र‌ओ ह । परमात्मा ओही बहुत धनी भी बना द‌ईन।

यरुशलेम म सुलैमान व मंदिर का बनाईस जेही बनामा के लाने वाखर बाप कहत र‌ओ ह । अऊ सामान का भी इकट्ठा करे र‌ओ ह । अब मनई मिलाप वाला तंबू म आराधना करे के बजे मंदिर म परमातिमा के आराधना करत र‌ए हें। अऊ ओखे लाने बलि चढ़ाए करत र‌ए हें परमातिमा व मंदिर म आके उपस्थित रहे करत र‌ए हें अऊ अपने मन‌ईन के साथ वास करे करत रए हें।

पर सुलैमान बहुत से अन्य मेहेरिअन के साथ प्रेम करत र‌ओ ह अऊ लगभग एक हजार मेहेरिअन से शादी करके परमातिमा के अनादर करिस। इन मन से बहुत सारे मेहेरिया दूसरे देश से आएं अऊ अपने साथ देवी-देऊतन का लाइन । उनखर पूजा पाठ करां लगें। जब सुलैमान बुढ़वा होईगा तब वहो भी ऊनखर उपासना करा लगो।

तब परमातिमा सुलैमान से बहुत गुस्सा र‌ए हें अऊ कहीन कि इस्राराएल देश का दूट्ठे अलग – अलग राज्य म टोर के ओही ओखे द्वारा दंड दईहीं। सुलैमान के मरे के बाद अईसा करहीं।

सुलैमान के मरे के बाद रहबाम राजा बनो अऊ सब इस्राएली ओही राजा के रूप म स्वीकार करेका इकट्ठा भें । ऊं रहबाम से शिकायत करिन कि सुलैमान उनसे बहुत मेहनत करवाई सी। अऊ बहुत से कर वसूली सी । रहबाम से ऊं विनती करिन कि उनसे कम काम करवाबा।

पर रहबाम उन्हीं बड़ी मूर्खता से जवाब द‌ईस कि तुम कहते ह कि मोर बाप तुमसे बहुत कठिन परिश्रम करवाई सी। पर मैं तुमसे अऊ कठिन परिश्रम करवई हों अऊ ओसे भी ज्यादा पीड़ा द‌ईहों।

जब मन‌ई ओही य कहात सुनीन त व म से बहुत सारे ओसे बलवा करिन। तब दस गोत्र ओही छोड़ द‌ईन अऊ केवल दूट्ठे गोत्र बचे अऊ ऊं अपने आपका यहूदा के राज्य कहीन‌।

बाकी के दस गोत्र यारोबाम नाम के मनई का अपन राजा बना ल‌ईन। य गोत्र देश के उत्तर-पूर्वी म बसो र‌ओ ह अऊ ऊं अपने आपका इस्राएल के राज्य कहीन।

पर यारोबाम परमातिमा से बलवा करीस अऊ मनईन से पाप करवाईस अऊ अपने मनईन के द्वारा उपासना करे के लाने दूट्ठे मूर्ति बनवाईस। अब यहूदा के राज्य म यरूशलेम म परमातिमा के मन्दिर म उनखर आराधना करे के लाने नई गें।

यहूदा अऊ इस्राएल के मनई शत्रु बन गें अऊ हमेशा एक दूसरेन से लड़त रहिगें।

इस्राएल के नया राज्य म सब राजा दुष्ट र‌ए हें। इनमन से कई राजा, इस्राएली के हाथ से मारे गें ज‌ऊन राजा बना क चाहत र‌ए हें।

इस्राएल राज्य के सब राजा अऊ अधिकतर मनई मूर्ति के उपासना करत र‌ए हें अऊ अक्सर वेश्यान के साथ म सोऊत र‌ए हें अऊ यहां तक कि अपन लरकन का मूर्ति के सामने बली करत र‌ए हें।

यहूदा राज्य के राजा दाऊद के वंश र‌ए हें । ईं राजा म से कई झन भले मन‌ई र‌ए हें अऊ न्याय पूर्वक शासन करिन परमातिमा के आराधना करिन। अऊ यहूदा के अधिकांश राजा दुष्ट र‌ए हें। ऊं दुष्टता से शासन करिन अऊ मूर्ति के उपासना करिन । यहां तक कि झूंठ-मूठ के मूर्ति के सामने अपन लरकन का बलि कर द‌ईन। यहूदा के अधिकतर मनई भी परमातिमा से बलवा करिन अऊ दूसर देवी-देऊतन के उपासना करिन।