36. ୩୬. ଯୀଶୁନା ରୁପ୍ ବଦଲ୍‌ବାର୍

ମିସିଙ୍ଗ୍,ଯୀଶୁ ମାଇନା ଶିଷ୍‌ଲେନ୍ ବିତ୍‌ରେନି ତିନ୍‌ଟା ରେମ ପିତର, ଜାବୁକ ମାରି ଆଯୋହନ ମାଇନା ବେରଙ୍ଗ୍ ରୁଙ୍ଗା।(ଯୋହନ ଅମିନାଯୀଶୁନା ଶିସ୍ ମାରି ଆଯୀଶୁ ଡୁବନ୍ ବେଡକୁନ୍ ଯୋହନ ମୁଇ ଆଣ୍ଡା।) ମାଏଲେ ତରଇ ପାର୍‌ତନା ଡେଡେମ୍ ପାଲାଇ ମୁୟଙ୍ଗ୍ ଡେଙ୍ଗ୍‌ବାଇ କୁଣ୍ତାବ ଇଗା।

ଯୀଶୁ ଉଣ୍ତୋଇଲ ପାର୍‌ତନା ଡେଡେନ୍ ଡେଙ୍ଗା,ମାଇନା ସାର୍‌ମ ସି ସୁଗ ତାରାଗ୍ ଡେଙ୍ଗା ମାରି ମାଇନା ସକା ତାରାଗ୍ ସୁଗ ଦବ୍ ଡେଙ୍ଗା ଜେ ଆର୍‌ନା ଦରତନିବ ଡିକୁନ୍ ଆର୍‌ନାସେ ରେମ ଡେଡେମ୍ ଆଗଙ୍ଗ୍‌ତା।

ମାଇନ୍ ତୁର୍‌ଗୁ ମୋଶା ମାରି ଏଲିୟ ଅସିଗା। କନ୍ ଉମ୍‌ବାୟଙ୍ଗ୍ ରେମ କନ୍ ଘଟ୍‌ନା ଜବର୍ ବରଷ୍ ଆଗ୍‌ତୁ କନ୍ ଦର୍‌ତନିବ ଡିଗା। ମାଏଲେ ଯୀଶୁନ୍ ବେରଙ୍ଗ୍ ମାଇନା ଗଗଇନା ବିଷୟ୍ କାତାବାତା ଡେଡେମ୍ ଡେଙ୍ଗା,ମାସାଡନା ଯିରୁଶାଲାମ୍‌ବ ମାଇ ଚଟ୍‌ନା ଗଇତା।

ଉଣ୍ତଇଲ ମୋଶା ମାରି ଏଲିୟ ଯୀଶୁନ୍ ବେରଙ୍ଗ୍ କାତାବାତା ଡେଡେମ୍ ଡେଙ୍ଗା,ପିତର୍ ଆ ଯୀଶୁ ସୁନ,“ନେଲେ ଆକା ଡିକୁନ୍ ବାନି। ନେଲେ ତିନ୍‌ଟା କୁଡିଆ ତିଆର୍ ଡେମ୍ ତନେ,ନନ୍ ପାଲାଇ ମୁଇ,ମୋଶା ପାଲାଇ ମୁଇ ମାରି ଏଲିୟ ପଅଲାଇ ମୁଇ।” ପିତର୍ ମାସୁସୁ ଡେଙ୍ଗା ଗିନା ମାଇ ମାମାଗ୍ ଆଗଙ୍ଗ୍‌ତା।

ଉଣ୍ତଇଲ ପିତର୍ କାତା ସୁସୁ ଡେଙ୍ଗା, ମୁଇ ତାରାଗ୍ ବାଦଲ୍ ଜଗ୍‌ତ ସାଗା ମାରି ଆମାଲେ ଗିନା ଡାବ୍‌ଲସୁଙ୍ଗ। ମାରି ବାଦଲ୍ ନି ମାଏଲେ କନ୍ କାତା ଅଙ୍ଗ“କନ୍ ନିଙ୍ଗ୍‌ନା ବାନିବାଇ ଗୁ ଆଜା ନିଙ୍ଗ୍ ଆଲାଦ୍ ଡେମ୍‌ତିଙ୍ଗ୍। ମାଇନ୍‌ବ ନିଙ୍ଗ୍‌ନା ସାର୍‌ଦା। ମାଇନା କାତା ଅଙ୍ଗ୍।” ଗିତିନ୍ ତିନ୍‌ଟା ଶିଷ୍‌ଲେ ବତୁଙ୍ଗ୍ ଇଗ୍‌ସେ ତୁବୁଗ୍ ବ ଲଗ୍ ଇଡିଗା।

ମାଇନାତୁର୍‌ଗୁ ଯୀଶୁ ଆମାଏଲେ ଚିଲ ମାରି ସୁନ “ଆବତୁଙ୍ଗା। ତଗ୍‌ଡାଗା।” ଉଣ୍ଡୋଇଲ ମାଏଲେ ତଗ୍‌ଡାଗ୍‌ସେ ଛାର୍‌ବେର୍‌ତି ଜୁଲ, ମାଏଲେ ତରଇ ବେରଙ୍ଗ୍ ଆଯୀଶୁ ଅନ୍‌ତୁରସେ ମାରି ଆଜାସା ଆଜୁତ।

ଯୀଶୁ ମାରି ମାଇନା ତିନ୍‌ଟା ଶିଷ୍‌ଲେ କୁଣ୍ତା ଜଗ୍‌ତ ଜର୍ ସାଗା। ମାଇନା ତୁର୍‌ଗୁ ଯୀଶୁ ଆମାଏଲେ ସୁନ “ଆକା ମା ଘଟ୍‌ଗା ଗିନା ଆଜାସା ଆସୁନ। ନିଙ୍ଗ୍ ଛଟ୍‌ନା ଗିତିଙ୍ଗ୍ ମାରି ମାର୍ ମୁସ ଜୀବନ୍ ଡେନ୍‌ତିଙ୍ଗ୍।ମାଇନା ତୁର୍‌ଗୁ ପେଲେ କନା ଆରେମୋଲେ ସୁସୁ ଗନ୍ତ୍‌ପେ।”