25. ୨୫. ସଇତାନ୍ ଆଯୀଶୁ ପରିକ୍‌ୟା ଡ଼େମ

ଯୀଶୁ ଡୁବନ୍ ରୁଙ୍ଗ୍‌କୁନ୍ ତୁର୍‌ଗୁ ଚଟ୍‌ନା ପବିତ୍‌ର ଆତ୍‌ମା ଆମାଇ ମରୁଭୁମି ବ ରୁଙ୍ଗଇଗା। ଯୀଶୁ ଆର ଚାଲିଶ୍ ଦିନ୍ ମାରି ଚାଲିଶ୍ ମିଣ୍ଡି ଡିଗା। ଗିତିନ୍‌ ବେଲା ମାଇ ଆଙ୍ଗ୍‌ଡା ଡିଗା, ମାରି ସଇତାନ୍ ଯୀଶୁନ୍ ବ ସାଗ୍‌ସେ ଆମାଇ ପାପ୍ ଡେଡେମ୍ ସା ଲାଲ୍‌ସା ୟ।

ଆଗ୍‌ତୁ ସଇତାନ୍ ଆଯୀଶୁ ସୁନ,“ନ ଜଦି ଈଶ୍‌ପର୍ ନା ଗୁ, ଗିତିନ୍‌ଲ ଆକନ୍ ବିରେଲେ ରୁଟି ଡେଡେଙ୍ଗ୍ ପାଲାଇ ସୁଁ, ମିରି ନ ସୁସୁମ୍ ଗଙ୍ଗ୍‌ତନ”।

ମାତର୍ ଯୀଶୁ ଆସଇତାନ୍ ସୁନ,“କନ୍ ଈଶ୍‌ପର୍ ନା ବହିବ ଲେକା ଡିତା,’ରେଲମେ ବୁର ସା ରୁଟି ନା ଦର୍‌କାର୍ ଆଡେନ୍‌ତା, ମାତର୍ ଈଶ୍‌ପର୍ ଆମାଏ ମା ମା ସୁନ୍‌ତ ଗିତିନ୍ ଦର୍‌କାର୍।

ଗିତିନ୍‌ ତୁର୍‌ଗୁ ସଇତାନ୍ ଆଯୀଶୁ ମନ୍ଦିର୍ ନା ଉଚ୍ ଡିକୁନ୍ ଟାନ୍‌ବ ରୁଙ୍ଗା। ମାଇ ଆମାଇ ସୁନ,“ନ ଜଦି ଈଶ୍‌ପର୍ ନା ଗୁ, ତୁବୁବ ଡଗା, ମାସାଡନା ଲେକାଡିତା,”ଈଶ୍‌ପର୍ ମାଇନା ଆଦୁତ୍‌ଲେ ଆନ ସସବ୍ ପାଲାଇ ଆଦେଶ୍‌ ବେତ ମିରି କି ନନ୍‌ ପାଦ୍ ବିରେ ବ ଆବାଙ୍ଗ୍‌ତା।

ମାତର୍ ସଇତାନ୍ ଆର୍‌ନା ଡେଡେମ୍ ସା ସୁନଡିଗା, ଯୀଶୁ ଗିତିନ୍ ଆଡେମ୍‌ତ। ଗିତିନ୍‌ ବାଦୁଲ୍ ମାଇ ସୁନଡିଗା,“ଈଶ୍‌ପର୍ ଆଗୁଲାଇ ରେମ୍ ସୁନନି, ପର୍‌ବୁ ନନା ଆଈଶ୍‌ପର୍ ପରିକ୍‌ୟା ଆଡ଼େମ।”'

ଗିତିନ୍‌ ତୁର୍‌ଗୁ ସଇତାନ୍ ଆଯୀଶୁ ଦର୍‌ତନି ନା ଗୁଲାଇ ରାଜି ଅଜୁଲ। ମାଇ ଆମାଇ ଅଜୁଲ ଗିନ ଗୁଲାଇ ଅଇଜା ବପୁ ମାରି ଅଇଜା ସାକାର୍ ଡିଗା। ମାଇ ଆଯୀଶୁ ସୁନ,“ନ ଜଦି ଜୁଆର୍ ଡ଼େମସେ ଆନିଙ୍ଗ୍ ପୁଜା ଡେମ୍‌ତନ, ଗିନ୍‌ଲ ନିଙ୍ଗ୍ କନ୍ ଗୁଲାଇ ବେତିଙ୍ଗ୍।”

ଯୀଶୁ ଉତ୍ତର୍ ବେଡ, ନିଙ୍ଗ୍ ନାନେ ସୁଲୁଙ୍ଗ୍ ୟା ସଇତାନ୍! ଈଶ୍‌ପର୍ ନା ବହି ବ ମାଇ ତରୟନା ଆରେମଲେ ଆଦେଶ୍‌ ବେତ,' ଆଜାସା ଆଣ୍ଡା ପର୍‌ବୁ ନନା ଈଶ୍‌ପର୍‌ନା ପୁଜା ଡେମ୍। ଈଶ୍‌ପର୍ ସୁଗ ଆମାଇ ଆକା ଆଲାଦ ଡେମ୍।

ଯୀଶୁ ସଇତାନ୍ ନା ଲାଲ୍‌ସା ନାନେ ଆର୍ ଆମାନ୍‌ତା, ଆତିନେ ସଇତାନ୍ ଆମାଇ ଅନ୍‌ତୁରସେ ଡ଼ୁଙ୍ଗା। ଗିତିନ୍‌ ତୁର୍‌ଗୁ ସରଗ୍‌ନା ଦୁତ୍‌ଲେ ସାଗ୍‌ସେ ଯୀଶୁନା ଜତନ୍ ରୁଙ୍ଗା।